అగ్ర కథానాయకుడు, సూపర్ స్టార్ రజనీకాంత్ (Rajinikanth) హీరోగా దర్శకుడు నెల్సన్ దిలీప్‌కుమార్ తెరకెక్కించిన ‘జైలర్ 2’ (Jailer 2) బాక్సాఫీస్ వద్ద సరికొత్త చరిత్ర సృష్టించింది. థియేటర్లలోకి వచ్చినప్పటి నుంచి కలెక్షన్ల సునామీ సృష్టిస్తున్న ఈ చిత్రం కేవలం 11 రోజుల్లోనే తమిళ చిత్ర పరిశ్రమలో అత్యధిక వసూళ్లు రాబట్టిన నంబర్ 1 చిత్రంగా నిలిచింది.
‘2.ఓ’ ఎనిమిదేళ్ల రికార్డు ధ్వంసం
గతంలో రజనీకాంత్ నటించిన ‘2.ఓ’ ప్రపంచవ్యాప్తంగా రూ.691 కోట్ల గ్రాస్ వసూలు చేసి అగ్రస్థానంలో ఉంది. ఇప్పుడు ఈ ఎనిమిదేళ్ల రికార్డును ‘జైలర్ 2’ ఆదివారంతో అధిగమించింది. అంతేకాకుండా, ప్రపంచవ్యాప్తంగా రూ.700 కోట్ల గ్రాస్ మార్కును దాటిన మొట్టమొదటి తమిళ చిత్రంగా ‘జైలర్ 2’ అరుదైన ఘనత సాధించింది. ఇప్పటివరకు ప్రపంచవ్యాప్తంగా రూ.700 కోట్ల క్లబ్‌లో చేరిన 7వ దక్షిణాది చిత్రంగా, మొత్తంగా 18వ భారతీయ సినిమాగా ఇది రికార్డు పుటలకెక్కింది.
11 రోజుల్లో వసూళ్ల ప్రభంజనం
ఆదివారం ఒక్కరోజే ఈ చిత్రం ప్రపంచవ్యాప్తంగా రూ.44 కోట్ల గ్రాస్ వసూలు చేసింది. దీంతో మొత్తంగా 11 రోజుల్లో ప్రపంచవ్యాప్తంగా వసూళ్లు రూ.710 కోట్ల గ్రాస్‌కు చేరుకున్నాయి. ఇండియాలో 11వ రోజు రూ.25.70 కోట్ల నెట్ రాబట్టడంతో, దేశీయంగా మొత్తం వసూళ్లు రూ.398 కోట్ల నెట్ (రూ.466.85 కోట్ల గ్రాస్) సాధించి, త్వరలోనే రూ.400 కోట్ల క్లబ్‌లోకి అడుగుపెట్టబోతోంది. గతంలో ‘జైలర్ 1’, విజయ్ ‘లియో’ చిత్రాలు మాత్రమే తమిళనాట రూ.400 కోట్ల క్లబ్‌లో చేరాయి.
ఓవర్సీస్‌లోనూ రజనీకాంత్ హవా కొనసాగుతోంది. 11 రోజుల్లో విదేశాల్లో ఈ చిత్రం 25.6 మిలియన్ డాలర్లను రాబట్టింది. ఇదే జోరు కొనసాగితే త్వరలోనే ‘జైలర్ 2’ చిత్రం ప్రపంచవ్యాప్తంగా రూ.900 కోట్ల మైలురాయిని చేరుకోవడం ఖాయమని ట్రేడ్ పండితులు అంచనా వేస్తున్నారు.